نهايه جعفر العمده هل كانت تستحق؟

كتب / احمد ماهر

انتهت رحلة جعفر العمدة و خلاص هنسيب السيدة زينب و نرجع كل واحد فينا لمطرحه ، هيوحشني استاذ احمد سعد و هو بيدخل فجأة يخضني و اتخيل لو في امكانية يدخل يغني في مواقف حياتي العادية و انا في الشغل

بعيدا عن كونك بتحب محمد رمضان او لا ، الا انه قدر يعمل مسلسل حلو و يشد جميع اطراف العائلة من اول الشباب حتي الرجال و السيدات الكبار في السن ، المخرج محمد سامي كان موفق في اختيار الابطال حقيقي هالة صدقي كان دورها حلو اوي و شخصيتها مكتوبة حلوة اوي ، مي كساب ، منه فضالي ، احمد داش ..

للاسف زينة دورها كان محجم اوي و من وجهه نظري البسيطة زينة بطلة و عندها كل المقومات فكانت محتاجة مساحة اكتر من كدة بكتير !

ايمان العاصي تم اعادة اكتشافها و حقيقي اعتقد في فرص جاية كتير قدام ، لانها تستحقها ..

منذر ريحانة شخصية قوية و كان لايق علي الدور بس كنت عايزة الخناقة الاخيرة تكون ملحمية اكتر من كدة بصراحة، عجبتني في النهاية فكرة ان محمد رمضان بيوصل رساله ان مافيش حد فوق القانون و انه مش هياخد حقة بأيده لا بلغ عنها البوليس هو يتصرف و هنا كان في ذكاء لانه مدرك ان فئة كبيرة من الشعب بتقلده ..

بردو ان وقف الربا و عرف ان دة اللي مقلل بركة حياته و اتكلم عن حرمانية الربا و السلف بالفوايد و دي بردو نقطة كويسة ..

النهاية لطيفة و المسلسل حلو و خلاص خلصنا ، احكولي انتم اية رأيكم في النهاية ؟ و اية رأيكم في المسلسل؟ و هل النهاية رضيتكم و رضيت فضولكم ؟