الحلقه السابعه من خالد وسيفيدا

كتبت د /أمل عبد العزيز
صاحبه القلم السعيد

صباح الخير او مساء الخير علي حسب أنتم بتسمعوا الفيديو ده امتي ومنين طبعا احنا وصلنا في قصه خالد وسيفيدا لمكان لا بأس به متهيقلي دلوقتي وضحت كتير امور واتصححت معلومات كانت خطأ عند كتير منكم
🔴 المهم
سبكم بقي من اللي كلنا عارفينه وإن بعد كده خالد صالح سيفيدا سافروا سواء أربع ايام تقريبا او اسبوع مش فاكره في مصيف وان بعد ما رجعوا بدأت سيفيدا تبعت إشارات لينا بأنها مع خالد وإن الامور تمام زي مثلا تلبس الجاكيت بتاعه او النضاره او تعمل لايك علي فيديو او تغريدة كده يعني

🔴 وبرضو أكيد كلنا عارفين إن خالد عمل حفله كبيره وسيفيدا حضرتك وكان لابس أوت فيت اسود وغني بيه طول الحفله وجه عند اغنيه معينه واللي كلنا عارفين إن الاغنيه دي هو كتبها وغناها وهو لابس القميص الاسود المخطط اللي سيفيدا جيباه ليه وكانت الاغنيه دي لسيفيدا شخصيا ايام المشاكل اللي كانت بينهم المهم يعمل ايه بقي خالد قبل ما يغني الاغنيه يدخل يلبس جاكت جلد اسود ويطلع يغني الاغنيه بالجاكيت ساعتها قولنا ياعني شكله سقع وبعد ما خلص الاغنيه لقناه راح قالع الجاكيت قولنا يمكن اتحر عادي بتحصل مجراش حاجه يعني

🔴 وعدت الحفله ونمنا في امان الله ونصحي الصبح علي فيديو لسيفيدا رايحه كوافير الشعر بتاعها ولابسه جاكيت خالد اللي كان لابسه في الحفله إمبارح واحنا اللي كنا فاكرينه سقعان اتاريها كانت اشاره لينا ومتفق عليها بين خالد وسيفيدا مقولكوش علي اللي حصل كلنا شغلنا عمرو دياب اديني رجعتلك اديني بين ايديكي كفاية دموع بقي مش عارف اشوف عنيكي وبقينا كلنا زي الهبل نرقص ونفرح شويه ونعيط ونلطم شويتين برضو من الفرحه حكم احنا فانز ملوش كتالوج نزعل نعيط نفرح نعيط ونلطم

🔴 المهم فضلوا كده ويبعتوا إشارات لينا واغاني ورسايل وكان يقال ان في اغنيه تانيه هو محضرها وهيهديها لسيفيدا يوم عيد الحب بس جه الزلزال وقلب كل الموازين بس برضو استفادنا اننا اتسربت لينا صوره تجمع خالد وسيفيدا من اجتماع التبرعات اللي اتعمل وشارك في كل نجوم تركيا الكبار وبرضو كانت ليه ياعمده وشغلنا ساعتها اغنيه الاستاذه شرين اللي بتقول فيها و بعدين بقي في قله النوم واليوم الملخبط ده تماشيا مع الاحداث الزلزال واننا زعلانين و بين اننا فرحانين أننا شوفنا صور لسيفيدا وخالد مع بعض.

🔴 برضو ما نتساش عيد ميلاد سيفيدا وان خالد نزل اغنيه علي صفحه شركه الاغاني اللي هو كان شريك فيها من صديق عمره واحتفل بحبيبت قلبه علي طريقته الخاصه نقوم احنا بقي نعرف ونسكت لا ازاااي نجخل بمناخيرنا ونفضح اللي جابوهم كأننا اكتشفنا بير بترول لحد ما خالد اتكسف وراحت الشركه حذفت الاغنيه وطلعت بيان بان الشركه بتنزل الاغاني من إنتاجها ومش قاصده أشخاص معينه وبطتنا كلنا وبعد ما كنا فرحانين وبنغني اغنيه بحبها وفي قلبي ساكن حبها قلبنا علي اغنيه الست اصاله وهي بتقول فووق من وهمك فووووق

🔴 المهم عدت الليله دي كمان زي ما كل الليالي إللي فاتت عدت وبعدها خالد وسيفيدا هما الاتنين سكتم بوكتم كانهم بيعقبونا ويقولولنا لما تعقلوا نبقي نبعتلكم اشارات يا مايلين
المهم فضلنا علي الحال ده وبعد كده بدات الاشارات تاني خالد يفتح التاجات نبص نلاقي كل صور خالد وسيفيدا مع بعض ما اتمسحتش منها حاجع وسيفيدا تفتح التاجات نبص نلاقي نفس الصور اللي هنا هي هي اللي هنا
وربنا ما يقطعلنا عاده وكالعاده ياساده قومنا متحزمين و مشغلين اغنيه انت عارف ليه قولي انتي ليه علشان احنا مع بعضينا ولا حدش بيبص علينا
وطبعا دي كانت معلومه مغلوطه لاننا كلنا حضرتك كنا في قلب الاكونتات قاعدين في قسم التاجات وعاملين لووولي فرح
المهم فضلنا فرحانين وايام مشتاقين وايام ساكتين لحد ما في يوم بدأ الحول يشتغل ازاي

لقينا سيفيدا بتعمل انفلوا لكتير من اصحابها واخواتها وناس كتير من علي الاكونت وشويه خالد عمل انفلوا لشركه الغناء اللي كان شريك فيها لصديق عمره صاحب الشركه ولابوه وابوه ابوه وقلب علي الكل طبعا احنا بدورنا لازم نساهم في هذا الحدث المبهم المسبب لحول لا ارادي لينا احنا كجمهور وخلانا مش عارفين منين يودي علي فين بس الله يكرمها الدكتوره لوليتا حبيبت قلبنا طلعت قالتلنا يابنات نقطه نظام مفيش اي مشكله بين خالد وصديقه وفهمتنا ان سواء خالد او سيفيدا بيعملوا كده لانهم عاوزين يبعدوا اي حد قريب منهم عن مجال الاضواء او انهم يكونوا دليل لينا اننا نعرف من خلالهم اخبار خالد وسيفيدا وكمان وضحت ان الاكونتات دي سواء لخالد او سيفيدا دي اكونتات شغلهم وان ليهم اكونتات شخصيه تانيه بتضم فقط اقاربهم واصدقائهم واخواتهم بسسس وفعلا لما فهمنا ارتاحنا وبدل ما كنا مشغلين اغنيه جبار للاستاذ عبد الحليم شغلنا اغنيه إيه اليوم الحلو ده إيه الناس الرايقه دي

🔴 في وسط الأحداث دي كلها كان في هبل تاني شغال ان سيفيدا وبطل العمل اللي قدامها علي علاقه ببعض وانهم سافروا يقضوا رأس السنة مع بعض وهما راجعين الفجر عملوا حادث والعربيه ادشدشت وطبعا اللي كتبت الخبر ده صحفيه من صحفيات الصحافه الصفراء كنوع من أنواع الترويج الرخيص للمسلسل وفضلت الاشاعات دي رايحه جاية ومش عارفين سيفيدا بقت مع بطل العمل ولا هي ما زالت مغ خالد

🔴 وفي نفس ذات اللحظة خالد زار كاست عمل مسلسل الاسيرات وبعدها تابع بطله العمل وشويه قالوا ان خالد علي علاقة معاها بس بصرآحه الاشاعه دي ما اخدتش وقت وطلع فانز اركي عامل نفسه صحفي بس الناس في الوقت ده كانت بتثق في اخباره وكتب بالبنط العريض خالد ينفي اي علاقه بينه وبين بطله عمل الاسيرات

🔴 شويه وطلعت سيفيدا وبطل العمل اللي معاها وبرضو نفوا صوت وصوره اي علاقه تجمعهم ببعض وأكدوا إنهم أصدقاء عمل فقط

🔴 الفترة دي كانت من أجمل الفترات اللي عشناها لاننا اتاكدنا ان خالد وسيفيدا وملهومش الا بعض والدنيا مشيت بعدها في هدوء وسلام اليىان جاء اليوم الاغبر اللي مطلعتلوش شمس ولا قمر متهيقلي وعلي ما اتذكر برضو ولا نجوم وطلعت صحافه صفرا منيلة بستين نيله وقالت خبر منيل ومهبب علي دماغها و متهيقلي شبهة وشها برضو قلب الدنياراسا علي عقب وأتسبب في بلاوي سوده بعد كده

🔴 وعلشان تعرفوا باقي القصه استنوني يوم 25/1 يوم عيد ميلاد الموقع بوابه بالعربي تركي الفنية علشان نكمل بقيت الأحداث واقولكم ايه اللي اتقال واللي اتعاد من الصحافه الصفرا وخالتي بمبه اللتاته ومن اطاطه المصديه ام بورنيطه
اوعوا تنسوا الميعاد 25/1.
ولنا في الحديث بقيه