اللي يتابع المحتوى الترفيهي والدرامي والإخباري الموجود في مصر حالياً هيشوف بسهولة إن فيه نقلة حلوة بتحصل بقالها فترة ونتيجتها بتظهر شوية بشوية.. خلال الشهور اللي فاتت ومهما كانت اهتماماتك أكيد لقيت نفسك في منتج واحد على الأقل من اللي بيتقدم على الشاشة وتابعته واتشديت له..
- على مستوى قطاع الأخبار حصل تطور مهم مبني على حلم قديم كنا بنحلم بيه من زمان إن يكون عندنا قناة إخبارية قوية عندها مراسلين في كل مكان يقدروا يوصلوا للمعلومة وللحدث في نفس لحظة حدوثهم ويكونوا هما مصدرهم الأول.. فيحصل تطوير لقطاع الأخبار ولقناة “إكسترا نيوز”، وتظهر قناة “إكسترا لايف”، و”القاهرة الإخبارية” اللي اتولدوا كبار بقيادة الأستاذ “أحمد الطاهري” Ahmed El Tahry، ومجموعة شباب تفتح النِفس عندهم لباقة، ثقافة، حضور، والأهم تمكن.
- تنتبه إن الفيلم الوثائقي وصناعته مهمين، فتخرج قناة “الوثائقية” للنور.. القناة اللي تم الإعداد ليها بمنتهى الكفاءة على مدار شهور واللي نجحت في الاستحواذ على عدد من الأفلام والسلاسل الوثائقية العالمية المتنوعة عشان محتوى ثري بيتعرض للمرة الأولى على الشاشات العربية.. وعشان يزيد الموضوع جودة يتم إسناد رئاسة قطاع الإنتاج الوثائقي للإعلامي “أحمد الدريني” Ahmed Elderiny، ورئاسة القناة الوثائقية للإعلامي “شريف سعيد” Sherief Said.
- نفس الكلام على الدراما.. إزاى تخلّي الناس ترجع تتمسمر تاني قدام الشاشة عشان تتفرج بشغف على مسلسلات مصرية حلوة وفيها فكرة ومافيهاش خجل؟.. فتكون النتيجة إنك تشوف مسلسلات زى “بالطو”، “وبينا ميعاد”، “ريفو”، وغيرهم.. وتشوف شباب موهبتهم تتاقل بالدهب زى “عصام عُمر” Essam Omar وزى “مريم الجندي”، والمخرج “عُمر المهندس”، وغيرهم من مخزون المواهب المصرية اللي مش بيخلص.. مسلسلات وراها كتيبة أساتذة محترفة وفاهمة بتختار وبتنقي إيه اللي هيعجب الناس وينفع يدخل البيوت بدون حرج.. أساتذة في مقدمتهم المبدع الأستاذ “يسري الفخراني” Yousry El Fakharany.. ولإن خيارات المشاهدة بتتطور في العالم كله ولازم تجاريها؛ بتتطور بالتوازي معاها منصة Watch it اللي بتجمع تحت اسمها كل الجمال ده بإدارة المميزة الأستاذة “نشوى جاد” Nashwa Gad.
- على مستوى البرامج التليفزيونية ظهرت برامج مهمة قلبت موازين المشاهدة لصالح المتعة وإن دماغك تتنور بعيد عن الإسفاف.. ظهر برنامج “الدوم” اللي سلط الضوء على مواهب مصرية متنوعة في كذا مجال وإداهم الفرصة يظهروها قدام الناس.. موهوب؟.. قدم وسيب الحكم للناس ولو موهبتك حقيقية هتنجح.
- الكورة عندنا فيها مشاكل كتير أكبرها العنصر الأهم إن مفيش لعيبة بتتأسس صح!.. فيكون جزء مهم من الحل في برنامج “الكابيتانو” اللي إدى الفرصة لكل الأطفال الموهوبين من كل المحافظات يشاركوا عشان يثبتوا موهبتهم ويقولوا إحنا أهو.. بدون واسطة ولا مجاملة.. موهوب؟.. قدم والملعب قدامك وفرّج الناس ولو حتى لا قدر الله مانجحتش فعلى الأقل اتعلمت والعيون شافتك.
- كام مرة شوفت نموذج مصري مشرف منور ومحقق إنجاز بره مصر، أو ناجح في شيء مبهر جوه مصر وكانوا الحالتين ضيوف برنامج “مصر تستطيع” تقديم الإعلامي “أحمد فايق” Ahmed Fayek كل أسبوع.. البرنامج المُلهم اللي بيشوّفك نجوم مصر في كل المجالات واللي بيثبت لك إنها تقدر وولادها يقدروا.
- رواد الأعمال الجُداد أو أصحاب المشروعات أو المخترعين محتاجين فرصة ودعم؟.. يظهر برنامج “Shark Tank Egypt” النسخة المصري ويديهم الفرصة يعرضوا أفكارهم قدام لجنة مكونة من ٦ من أهم رجال الأعمال المصريين عشان لو الفكرة عجبت حد منهم يمولها.. ومش هما وبس لكن أنت كمان كمشاهد في كل حلقة تلاقي كمية مهولة من النصايح المجانية اللي تتوزن بالذهب بتتقال بشكل مجاني وبتخليك تتعلم أكتر عن التفاوض وعرض فكرتك وإيه الغلطات اللي ممكن تقع فيها وأنت بتبتدي مشروعك!.
- سلّط الضوء على المصانع المصرية الناجحة واللي ليها اسم في الحتة بتاعتها وخلّي الناس تعرف الحكاية بتتعمل إزاى، وإن عندنا مصانع ناجحة بتصّدر منتجاتها للخارج.. فيظهر برنامج “الكونتينر” ويحكيلك كل حلقة عن صناعة جديدة تبقى فخور بعدها بولاد بلدك ودماغهم.
- فرّج الناس على جمال الأماكن السياحية وشجعهم يشوفوا بلدهم من منظور مختلف.. فيظهر برنامج “أيمن وسكر” اللي بيلف محافظات مصر كلها في إطار كوميدي لطيف بضمان خفة دم وحضور “أيمن مصطفى” Aiman Mostafa.
- يمكن المساحة ماتكفيش لرصد كل اللي يستحق يتقال بس إجمالاً فيه مجهود محترم بيحصل ونتايجه ملموسة وراه شركة عايزة تعمل شيء مختلف في كذا اتجاه والكل تحت عنوان واحد هو “المتحدة للخدمات الإعلامية”.. أنت وزنت المعادلة بمنتج حلو متعوب عليه ومعتمد في أساسه على عنصر واحد مشترك هو “الشباب” اللي بياخدوا فرصتهم سواء في كونهم واجهة تشرف للتطوير اللي بيحصل أو الشباب اللي بياخدوا فرصة عشان يقولوا إحنا أهو بموهبتنا أو فكرنا.. كنا زمان بنقول إننا اتأخرنا كتير بس دلوقتي فيه خطوات مهمة بتقول إننا اتحركنا لقدام وبدأنا نسابق ولسه هنسبق.. شكرًا لكل واحد فكر وبيشتغل عشان نكون في المكان والمكانة اللي نستحقهم.
