كتبت د / امل عبد العزيز
تسمحولي اتجرأ وانقد محمد رمضان ومسلسله جعفر العمدة : نقد موضوعي ومن غير زعل:
اولا : هو صعب علي محمد رمضان ده يطلع دور راجل محترم طبيعي زي معظم الناس ؟؟؟
ماينفعش يطلع غير بلطجي او صايع او معلم كبير بس يبقي مرابي بيسلف الناس بالفايظ ؟؟؟
احنا مش حانختلف علي حب الجماهير ليه .. وتأثيره الغريب عليهم .. طب ليه ما يستغلش ده في انه يدي مثال وامل للناس الطبيعية المحترمة عن طريق قصة كفاح شاب طبيعية مش من كوكب تاني ؟؟؟
ومش لازم يبقي صايع وبلطجي وبيضرب الكل وممكن يقتل كمان عادي !!!
وليه لازم يطلع يضرب ويكسر ويغرس في نفوس الناس ان اخد الحق بالدراع والضرب والبقاء للاقوي في سياسة الغابة اللي بيعلمها للي بيحبوه !!
وهو ليه لازم يبقاله كلمه “واطية ” او عادة مؤرفة يستحدثها في كل عمل درامي !! زي يا ليفة وزي الملعقة بالشقلوب ديه !! حاجة مقززة !!
ليه اعماله بترسخ دايما عادات جديدة وتقلب موازين القيم اللي المفروض مسلم بيها ؟؟ يعني واحد مرابي وصايع هو اللي بيحكم بين الناس وبيرتضوا حكمه؟؟!!!
يعني ايه قانون البلطجة والاستقوا هو اللي لازم يغلب ؟؟؟
والبلد سايبة ؟؟ مافيه مرة ياربي البوليس ييجي او يمسك اللي بيضرب ويبلطج !!!مفيش خااالص ؟؟؟؟؟
ليه التشجيع علي فكرة جواز الاربعة عادي كده والستات طالعين عايشين بس علشان اليوم اللي يجي دور كل واحدة فيهم فيه؟؟؟
ليه ثريا مطلعينها حرامية او عندها داء السرقة ومع ذلك حبوبة عادي وكلهم متصالحين مع الفكرة وعايشين عادي معاها ؟؟؟
وليه نرجس بتاعت اعمال وبلاوي سودة ومع ذلك عادي برضه عايشين مع بعض مفيش اي مشكلة ومطلعينها دمها خفيف واخر حلاوة
وليه يطلعوا دلال الزوجة اللي المفروض تبقي الزوجة اللي بتموت في جوزها من زمان واللي هي الطبيعية اللي فيهم قال ،، واللي المفروض تبقي مثال للمودة والرحمة والسكينة وعيلتها طيبة المفروض لولا اللي حصل لابنهم ، تطلع فيها كمية الشر اللي اصلا لايمكن تكون طبيعية ؟؟واللي كمان بتوري ان لو ضرتك مضايقاكي او اي حد مضايقك عليكي بالبلطجية وكله بالفلوس يخلص وما اسهل القتل وانتي ضميرك مرتااح؟ افكار ماتجيش علي بال غير المجرمين المتأصلين العتاه !!؟؟
وليه واحده ارستوقراطية زي عايدة الحوجة ممكن تخليها تبيع نفسها لواحد واطي معاه فلوس !!!
هو ده اللي بنعلمه للبنات ؟؟ وانها كمان ايه تحبه عادي اوي ؟؟؟ ازاي يعني ؟؟؟ ما بتقرفش من عاداته وطريقة اكله وشربه ولبسه وريحته!؟
لا الفلوس اهم طبعا !!!
وصفصف ديه بالرغم ان دمها خفيف ، بس بتشجع الحموات علي قلة الادب وشتيمة مرات ابنها عادي !! وتضربها كمان ما يضرش ؟؟ لا ولازم البنت تطبلها علشان ترضي عنها !!!
والا النيلة اللي اسمها وداد ديه مطلعين عااادي خالص .. تخلعي جوزك وتعيشي معاه في الحرام لحد ماتلاقي غيره ولا فيه حسيب ولا رقيب وكبيرها اخدت قلم من سيد لما التاني رماها وعقاابها طبعا حايكون ان فلوسها حاتتسرق وخلاص !!؟؟؟ والاغرب ان اللي اتجوزها عادي عارف انها كانت معاشرة طليقها في الحرااام شوفوا الافكار !!؟؟؟ بالذمة ده مش حرام !!!!
ايه كم القرف والباكابورت الللي اتفتح علينا ده ؟؟
سيبكوا ان الفصة مشوقة وتشد علشان موضوع ابنه ده ..
بس اللي يتعمق ويشوف بنظرة عميقة شوية ويشوف السم اللي محطوط في العسل والقيم الجديدة اللي بتتزرع في اذهان الناس .. حايفهم انا قصدي ايه!!! مع كامل احترامي للكل ..
انا كمان اتفرجت علي المسلسل والحاجة الوحيدة اللي خليتني اشوفه كم الاعجاب من ناس كتير منهم اصدقاء محترمين باحترم رأيهم قولت اماا اشوف الاعلي مشاهدة ده واللي فيه حي في القاهرة وزعوا شربات لما جعفر خرج من السجن !!!!!!..
بس مع كامل احترامي لرأيهم .. انا شايفة ان النوع ده من الاعمال بيدبح بدم بارد كل القيم والاخلاق والعادات الحميدة اللي اتربينا عليها واتعرف بيها مجتمعنا المصري المحترم
وبيزرع وبيرسخ قيم ومبادئ جديدة حاتخلينا نعاني السنين اللي جاية
وبيدي للاسف صورة سيئة عن مصر وعن المجتمع المصري للبلاد العربية اللي بتتابع محمد رمضان في كل اعماله ولاحول ولاقوة الابالله
وبما اني حقانية ورأي حر وبقول كلمة الحق دايما ::
وزي ما انتقدت مسلسل محمد رمضان وقولت ما فيه من مساوئ وعيوب تؤثر علي المجتمع اللي بيتابعه وعلي منظر مصر امام الدول العربية اللي بيحبوه وبيتابعوه
وبالرغم اني ماليش فيه خاالص وشايفه انه ممكن يوجه شعبيته الكبيرة في الاوساط الشعبية بانه يكون مثال وقدوة في قصة كفاح لشاب طبيعي مش لا زم بلطجي ومعلم وكله بالدراع ..
بس كان لازم بعد انتهاء اخر حلقة ..واللي الظاهر محمد سامي حد بلغه والله اعلم ،
فاذا بنهاية مسلسل جعفر العمدة اخيراااا .. والي حد كبير تعتبر نهاية كويسة ، وفيها ايجابيات و. ..تصحيح لبعض السلبيات ..
فمثلا ::
انه يعترف ان الربا اللي كان بيمارسه حرام وانه سبب كعبلة حياته كلها ، و يتوب …ديه ايجابية
انه يطلق كل الستات ويبقي فقط واحدة علي زمته لانه اعترف ان مشاكل الموضوع ده كبيرة لاحصر لها ..ديه ايجابية
ان نرجس تحس ان للزوجة حق اكبر علي زوجها من مجرد ليلة تقضيها معاه .. وتكون هي اقصي امانيها وان الزواج لابد ان يكون مشاركة وتعاون ومودة ورحمة. … فديه ايجابية
انه مارجعش لعايدة لان فرق المستوي عمره ما حايتغير وان ربنا خلقنا طبقات ..ديه ايجابية
انه وداد اتشردت في الشوارع نتيجة لفجرها وبقي مصيرها التسول ..ديه ايجابية
ان دلال لاقت المصير اللي تستاهله بعد اجرامها بالسجن هي واخواتها المجرمين ..ديه ايجابية
ان الاخوة مهما كانوا مختلفين بس لازم يتحابوا ويدافعوا عن بعض مهما كان ..ديه ايجابية ..
ان الام مهما كان ماتقدرش حد ييجي جنب ولادها وتسكت ابدا … ديه ايجابية
ان البوليس اخيرااااا تدخل وشوفناه بيقبض علي البلطجية (بعد ماضربهم رمضان طبعا لازم ) بس ماشي .. كويس برضه
وبصراحة هالة صدقي ادت دور عمرها ، والممثلين اجتهدوا الي حد كبير ..
لكن ده برضه ما يمحيش اني شايفة ان الدراما تؤثر بشكل مباشر وقوي جدا ..في تشكيل وجدان المجتمع ، بل وتوجيهه كمان وتغيير مفاهيمه ومعتقداته في كثير من الاحيان …وهي مش لازم تكون تصوير لاسواء ما في الواقع .. ولا تجسيد لاسواء مافي البشر زي كتير ما بيقولوا وعلشان تبقي من الواقع …بالعكس..
الدراما ممكن تكون سبب في زيادة السياحة في بلد معين زي في تركيا مسلسلاتهم حتي في حارة فقيرة بتلاقيها زي الفل ومبهجة وبيوتهم شمعة منورة ، ده غير الشياكة وجمال المناظر الساحرة …
والا لبنان الرائعة ورقي مسلسلاتهم وشياكتها
وجمال مناظرهم الطبيعية
والدراما برضه تكون سبب في ارسال رسايل ان البلد ديه لا تقهر وهي اللي بتدافع وتخلص العالم من الاشرار وهي اللي فيها الابطال وهي سيدة العالم زي امريكا كده
أو مثلا … ان البلد ديه بلد الرومانسية والجمال وشهر العسل زي بورتوفينو والمالديڤز
أو ان البلد ديه بلد مخدرات ومافيا وبلاوي سودة زي كولومبيا وغيرها
فالدراما هي اللي انت بتصدر من خلالها فكرك وتكوينك ورسالتك للعالم كله …داخليا وخارجيا …
فا ..مانبقاش نزعل بقي لماحد يعايرنا …باننا بلد العشوائيات والبلطجة وغياب القانون والا بلد عدم الامان واخذ الحق بالدراع ويروحوا ويتمتعوا في بلد زي تركيا أو في لبنان ، والامارات الحبيبات
يارب الرسالة توصل 🙏🏻
